Quantcast
Channel: Tempos Dixital » Todos vós sodes capitáns
Viewing all articles
Browse latest Browse all 2

Marcos Nine: «O autocontrol que todos temos débese ao noso medo ao descoñecido»

0
0

En xaneiro xa falabamos de Marcos Nine e de Inasible #2 (2011), un traballo que el mesmo presentaba en Cineuropa. Naquel momento, todos asistentes a sesión do Panorama Audiovisual Galego celebrada no CGAC en Compostela, puideron presenciar un avance do que sería o proxecto experimental final de La Brecha. Daquelas Nine dicía dela «é unha peza mainstream, chea de efectos visuais moi potentes e sen argumento». Pasaron tres meses, e hoxe sabemos que La Brecha se estreará o 12 de Abril no Abasto Shopping Center en Bos Aires. Será a única peza galega presente no BAFICI (Buenos Aires Festival Internacional de Cine Independiente) e aínda que non competirá, formará parte da sección Cine + Cine.

Inasible #2 mostrábase como un collage feito con anacos de película mercada en rastros e tratada graficamente. A película era a base sobre a que acontecían explosións e desordenes, un berro de protesta ante o propio ‘oficio’ que moitas veces actúa como unha prisión para o autor. O proxecto documental que se estreará en Arxentina segue a mesma liña. A súa finalidade non é a de contar a historia deste proxecto senón ilustrar como é ser partícipe del mesmo. Na propia web de La BrechaNine explica que o proxecto e filme conforman dúas partes diferentes. Por un lado está Rodrigo Losada, deseñador gráfico e culpable de que se comezarán a facer os primeiros experimentos e Marcos Nine como director. Antes da súa viaxe a Bos Aires falamos con el para que nos conte máis cousas de La Brecha.

Marcos Nine durante o proceso de creación de La Brecha

Que hai en La Brecha do proxecto inicial que tiña Rodrigo Losada?

Supoño que todo. Cando comezamos a pensar en facer a película, o proxecto La Brechaera o protagonista e falando con Rodrigo démonos conta de que non lle faríamos xustiza ó proxecto se eu me limitada a miralo desde a distancia, así que a solución foi meterme dentro do proxecto e reinterpretalo desde o meu propio traballo. No filme Rodrigo e máis eu estamos en dous estados distintos, el fala desde a experiencia que supuxo idear este proxecto e eu desde a inocencia de comezar a explorar materiais e procesos sen saber o resultado que vou conseguir. De feito creo que o mellor do filme é que resulta irrepetible. A propia experiencia aprendida durante a súa realización fai que sexa imposible recuperar a inocencia inicial. Creo que é un filme no cal o concepto «educación» ten moita importancia.

Na páxina web do proxecto dis que tanto ti coma Rodrigo chegarades a unha mesma conclusión: as diferencias nos traballos que realizastes, sempre fostes capaces de solucionalos cunha metodoloxía idéntica. Sufristes na vosa propia pel como é estar baixo os mecanismos deste ‘autocontrol’ á hora de realizar unha obra? Serviu de terapia?

La Brecha é un proxecto artístico e usar a arte como terapia é menosprezala. Non me gustaría que se dese a idea que fixemos isto para desafogarnos iso sería como insultar a tódolos grandes artistas que se arriscaron e fixeron da súa obra a súa vida. Sería como dicirlles: «Agora que xa tivestes divertimentos bastantes poñédevos a facer cousas serias». La Brecha é un proxecto de descubrimento e coñecemento. O autocontrol que todos temos débese ao noso medo ao descoñecido. Cando sabemos facer algunha cousa «ben» prodúcenos un medo atroz cambiar a nosa forma de traballar. En parte, débese a que non temos ningunha seguridade sobre o que non coñecemos e tamén porque se somos eficientes e efectivos no noso traballo o noso entorno vainos condicionar para que sigamos actuando da mesma maneira. Aparece o medo a fallar, ó fracaso, á incomprensión e isto remata por provocar obras moi medidas, seguramente correctas pero tamén con excesiva contención. É xustamente o que tiñamos que evitar neste filme, e a verdade é que non foi nada doado pero mereceu moito a pena.

Inasible #2, a peza que preséntache en Cineuropa, era como un collage de fotogramas de película ao igual do que será La Brecha. Cal é o seu vínculo? 

La Brecha é un filme en catro partes e Inasible #2 é unha desas partes, o que pasa é que pensamos que era unha peza que tiña entidade por si mesma e por iso a movemos tamén por separado. Trátase dunha curta abstracta na que emprego distintas técnicas de degradación de material de 16mm e de super-8. A orixe do material é moi diversa, hai material que filmamos nós, outro mercámolo, temos tamén descartes de traballos de outra xente, probas de super-8… Hai de todo e todo forma parte do xogo que nos plantexa a película. Por un lado, rescatamos anacos de película do lixo, por outro, creamos unha peza na que as imaxes do interior dos fotogramas son intranscendentes e as manifestacións do noso traballo vense por riba do fotograma, é dicir, empregamos o material de película como un lenzo ou un simple soporte sen importar o que hai dentro. 

Cinco operas primas de cinco cineastas distintos, é a nosa repercusión en Galicia é nula

Esas partes abstractas de La Brecha son tamén as máis expresiva e de máis forza. Mais que hai das partes narrativas desta longametraxe documental?

Creo que no fondo La Brecha é un filme máis clásico do que parece a simple vista. Supoño que a principal diferencia é que aquí en lugar de seguir un argumento o que seguimos é un estado de ánimo ou unha evolución do pensamento. O filme parte dun estado de esgotamento persoal, ó sentir que dalgún xeito que o meu traballo comezaba a converterse no uso reiterado dun método, e a partires de aí, o filme vai evolucionando pouco a pouco valéndome sobre todo de símbolos. Intento explicar o meu estado de ánimo facendo comparacións con comportamentos animais. Dun lado esta o can que simboliza a eficiencia, a fidelidade, e o animal que fai o que se considera correcto sen facerse preguntas. Despois está a formiga que é quen se aventura a explorar o mundo que non coñece, e despois o paxaro que simboliza a liberdade e ese poder voar e volver á terra cando quere. Pensando nesta visión máis simbólica, La Brecha está narrada desde o punto de vista da formiga.

O ano pasado dicías nunha entrevista que proxectos como La Brecha son de moito desgaste emocional. Que supuxo para ti antes, durante e que supón agora unha vez rematada esta longametraxe tan pouco común? 

Fun dando bandazos moito tempo. Eu vivía o filme en directo. Non se trata dunha película na que poidas dicir que hai unha fase de guión, rodaxe e montaxe, de feito había que desmontar esa lóxica. Comecei sorteando a orde dos contidos do propio filme, despois mercamos películas de 16mm e eu non tiña nin idea do material que me ía atopar e despois está toda esa parte de reflexión sobre min mesmo que non sabía como ía quedar plasmada na película. Todo isto desgástache moito, éntranche medos, pensas que o filme non vai ser comprendido, estás constantemente nun tira e afrouxa contigo mesmo na que a túa parte máis racional che pide que te aferres ó que xa sabes que funciona. Tamén me foi de moita axuda as veces que falei con Rodrigo da súa propia experiencia. Ó final cheguei a soltarme e romper esa barreira da contención autoimposta. Agora, xa con distancia, a película fíxome gañar en seguridade e a valorar tamén mellor o que levaba feito ata o momento. Creo que despois de facer esta película podo afrontar proxectos futuros, xa sexan máis convencionais ou máis arriscados con moita máis serenidade e sen medo a romper certas regras.

Fotogramas do filme La Brecha

Unha vez máis os recoñecemos para os cineastas galegos veñen primeiro de fóra. Que sensación che produce isto?

Neste caso non é exactamente así xa que o ano pasado xa fixeramos un obradoiro do proxecto para nenos na Mostra de cinema Periférico S8 e este ano non só faremos alí a estrea da película en España senón que ademais levaremos unha ampla mostra do proxecto, como unha instalación da que se pode ir vendo en internet o seu proceso de construcción. O que si é certo é que se menospreza aos cineastas galegos en moitos sentidos. Actualmente, no que se refire ó cine de non-ficción, estamos vivindo un momento que dificilmente se volverá a repetir, nun período de tres anos, entre outros títulos, Todos vos sodes capitáns pasou por Cannes, Vikingland por Marsella, Trálas luces por Donostia e agora está La Brecha en Bos Aires e N-VI en Málaga. Isto é un éxito, sen embargo, e tratándose ademais de cinco operas primas de cinco cineastas distintos, a nosa repercusión en Galicia é nula. A mensaxe que se envía desde as institucións é que o cinema galego ten que saír fora, pero cando vas a festivais internacionais non estás competindo contra outros filmes exclusivamente senón que estas a competir tamén contra ministerios de cultura de outros países que si apostan polos seus cineastas. Nós tivemos que facer esta película cun orzamento 100 veces menor que o orzamento medio dunha película española, gracias a unha bolsa de talento, e aínda así superamos tódalas limitacións do mundo e estrearemos en Bos Aires. O ideal sería que existise un apoio institucional acorde aos resultados que estamos conseguindo pero a sensación de euforia polo que se está a conseguir nestes anos non no la pode quitar ninguén. Hai que seguir adiante.

Para ver La Brecha en terras galegas haberá que agardar ata o mes de xuño. Será no S8 a Mostra de Cine Periférico da Coruña.

Ver trailer de La Brecha (Marcos Nine, 2011) en Youtube

Máis traballos de Marcos Nine, pinchar aquí


Viewing all articles
Browse latest Browse all 2

Latest Images

Vimeo 10.7.0 by Vimeo.com, Inc.

Vimeo 10.7.0 by Vimeo.com, Inc.

HANGAD

HANGAD

MAKAKAALAM

MAKAKAALAM

Doodle Jump 3.11.30 by Lima Sky LLC

Doodle Jump 3.11.30 by Lima Sky LLC

Doodle Jump 3.11.30 by Lima Sky LLC

Doodle Jump 3.11.30 by Lima Sky LLC

Vimeo 10.6.2 by Vimeo.com, Inc.

Vimeo 10.6.2 by Vimeo.com, Inc.

Vimeo 10.6.1 by Vimeo.com, Inc.

Vimeo 10.6.1 by Vimeo.com, Inc.

Vimeo 10.6.0 by Vimeo.com, Inc.

Vimeo 10.6.0 by Vimeo.com, Inc.

Re:

Re:



Latest Images

Vimeo 10.7.0 by Vimeo.com, Inc.

Vimeo 10.7.0 by Vimeo.com, Inc.

HANGAD

HANGAD

MAKAKAALAM

MAKAKAALAM

Doodle Jump 3.11.30 by Lima Sky LLC

Doodle Jump 3.11.30 by Lima Sky LLC

Doodle Jump 3.11.30 by Lima Sky LLC

Doodle Jump 3.11.30 by Lima Sky LLC

Vimeo 10.6.1 by Vimeo.com, Inc.

Vimeo 10.6.1 by Vimeo.com, Inc.

Vimeo 10.6.0 by Vimeo.com, Inc.

Vimeo 10.6.0 by Vimeo.com, Inc.

Re:

Re:

Re:

Re: